spotnewswebsite@gmail.com
ചണ്ഡിഗഡ്∙ മെഡിക്കൽ സ്റ്റോറിൽ ലഹരി വിൽക്കുന്നത് ചോദ്യം ചെയ്ത ലഹരിവിരുദ്ധ പ്രവർത്തകനെ കടയുടമ വെടിവച്ചു കൊലപ്പെടുത്തി. പഞ്ചാബിലെ മാൻസയിൽ ഇന്നു രാവിലെയാണ് സംഭവം. ലഹരിവിരുദ്ധ പ്രവർത്തകനായ പർവീന്ദർ സിങ് ജോട്ട എന്നയാളാണ് കടയുടമയുടെ വെടിയേറ്റ് കൊല്ലപ്പെട്ടത്. കടയുടമയെ ചോദ്യം ചെയ്യുന്നത് ഫെസ്ബുക്കിൽ ലൈവിൽ പങ്കുവയ്ക്കുന്നതിനിടെയാണ് പർവീന്ദറിന് കടയുടമയുടെ വെടിയേൽക്കുന്നത്.
അഞ്ചു മിനിറ്റ് ദൈർഘ്യമുള്ള വിഡിയോയിൽ പ്രായമായ ഒരാൾക്കൊപ്പമാണ് പർവീന്ദർ മെഡിക്കൽ സ്റ്റോറിൽ എത്തുന്നത്. തുടർന്ന് ലഹരി വിൽക്കുന്നതുമായി ബന്ധപ്പെട്ട് കടയുടമയും പർവീന്ദറും തമ്മിൽ വാഗ്വാദം നടക്കുന്നു. കടയുടമ ഒരു തോക്ക് കൈവശം വച്ചിരിക്കുന്നതും വിഡിയോയിൽ കാണാം.
‘നിങ്ങളെന്തിനാണ് തോക്ക് കൈവശം വച്ചിരിക്കുന്നത്, എന്നെ കൊല്ലാനോണോ, എന്നാൽ കൊന്നോളൂ’ എന്ന് പർവീന്ദർ കടയുടമയോട് പറയുന്നത് വിഡിയോയിൽ കാണാം. പൊലീസിനെ വിളിക്കാനും കൂടുതൽ ആളുകളെ വിളിച്ചു കൂട്ടാനും പർവീന്ദർ കൂടെയുള്ള ആളിനോട് പറയുന്നുണ്ട്. സിസിടിവി കാണിക്കാനും പർവീന്ദർ ആവശ്യപ്പെടുന്നുണ്ട്. തുടർന്ന്, തന്നിൽ നിന്നാണോ ലഹരിമരുന്ന് വാങ്ങിയതെന്ന് കടയുടമ പ്രായമായ ആളോട് ചോദിച്ചു. ‘അതെ ഞങ്ങളുടെ പക്കൽ അതിന്റെ റെക്കോർഡിങ് ഉണ്ടെ’ന്ന് പർവീന്ദർ മറുപടി നൽകി. ഏതാണ്ട് നാലു മിനിറ്റോളം നീണ്ട തർക്കത്തിനൊടുവിൽ കടയുടമ വെടിയുതിർക്കുകയും പർവീന്ദർ കൊല്ലപ്പെടുകയുമായിരുന്നു. വെടിയേറ്റതോടെ പർവീന്ദറിന്റെ ഫോൺ താഴെവീഴുകയും ലൈവ് റെക്കോർഡിങ് അവസാനിക്കുകയുമാണ്. തുടർന്ന് കടയുടമ ഓടി രക്ഷപ്പെട്ടു.
വർഷങ്ങളായി മൻസയിലും സമീപ പ്രദേശങ്ങളിലും ലഹരി ഉപയോഗത്തിനെതിരെ ശബ്ദമുയർത്തുകയും വിൽപനയ്ക്കെതിരെ പോരാട്ടം നടത്തുകയും ചെയ്യുന്ന ആളാണ് പർവീന്ദർ. ഫെയ്സ്ബുക്കിൽ 24,000 പേർ പിന്തുടരുന്ന പർവീന്ദർ ഇത്തരത്തിലുള്ള ഇടപെടലുകളിലൂടെയാണ് സമൂഹമാധ്യമത്തിൽ ശ്രദ്ധ നേടിയത്.
