ന്യൂഡൽഹി∙ 6,000 കോടി രൂപയുടെ മഹാദേവ് ഓൺലൈൻ ചൂതാട്ട സംഘത്തിന്റെ പ്രധാന സൂത്രധാരൻ സൗരഭ് ചന്ദ്രാകറെ ഒമാനിൽനിന്ന് സിബിഐ ഇന്ത്യയിലെത്തിച്ചു. റായ്പുരിലെ സിബിഐ പ്രത്യേക കോടതിയിൽ ഹാജരാക്കും. ചന്ദ്രാകറെ തിരികെ എത്തിക്കാൻ ഇന്ത്യൻ ഏജൻസികൾ ഏറെ നാളായി ശ്രമിക്കുകയായിരുന്നു.

 

ഇന്റർപോളിന്റെ റെഡ് കോർണർ നോട്ടിസിന്റെ അടിസ്ഥാനത്തിൽ 2024 ഒക്ടോബറിൽ യുഎഇ അധികൃതർ ചന്ദ്രാകറെ തടഞ്ഞുവച്ചു വീട്ടുതങ്കലിലാക്കിയിരുന്നു. ചന്ദ്രാകറെ വിട്ടുകിട്ടാൻ ഇന്ത്യ അപേക്ഷ നൽകിയെങ്കിലും സാധിച്ചില്ല. പിന്നീട് ഇന്റർപോൾ നോട്ടിസിന്റെ അടിസ്ഥാനത്തിൽ ഒമാൻ പൊലീസ് ഇയാളെ കസ്റ്റഡിയിലെടുത്തു. സിബിഐയും ഇ.ഡിയും ശേഖരിച്ച തെളിവുകൾ ഒമാൻ പൊലീസിനു കൈമാറി. നാടുകടത്താൽ അനുവദിച്ചതോടെ സിബിഐ സംഘം ഒമാനിലെത്തി ചന്ദ്രാകറെ ഇന്ത്യയിലേക്ക് കൊണ്ടുവരികയായിരുന്നു.

 

മഹാദേവ് ആപ്പ് പ്രൊമോട്ടർമാരിൽനിന്ന് കൈക്കൂലി വാങ്ങിയെന്ന് ആരോപിക്കപ്പെടുന്ന ചില ജനപ്രതിനിധികളും ഉദ്യോഗസ്ഥരും പൊലീസുകാരും അന്വേഷണ പരിധിയിലാണെന്ന് സിബിഐ പറയുന്നു. മുൻ ഛത്തീസ്ഗഡ് മുഖ്യമന്ത്രി ഭൂപേഷ് ഭാഗലിന്റെ പേരും സിബിഐയുടെ എഫ്ഐആറിലുണ്ട്. സൗരഭ് ചന്ദ്രാകറും സഹസ്ഥാപകൻ രവി ഉപ്പലും ചേർന്ന് ഭൂപേഷ് ഭാഗലിന് 508 കോടി രൂപ കൈക്കൂലി നൽകിയതായി ഇ.ഡി കുറ്റപത്രത്തിൽ ആരോപിച്ചിരുന്നു. എന്നാൽ ഈ ആരോപണങ്ങൾ ഭാഗൽ നിഷേധിച്ചു.