മീനങ്ങാടി: മീനങ്ങാടി  സ്കൂളിലെ വിനോദയാത്രയുമായി ബന്ധപ്പെട്ട് സോഷ്യൽ മീഡിയയിൽ പ്രചരിക്കുന്ന ആരോപണങ്ങൾക്ക് വിശദീകരണവുമായി പിടിഎ പ്രസിഡന്റ് ഹാജിസ്.  താൻ വയറിന് ബുദ്ധിമുട്ടുള്ളതിനാൽ കഴിച്ച മരുന്നിന്റെ പേരിൽ തെറ്റിദ്ധാരണ ഉണ്ടാകുകയായിരുന്നുവെന്നും, സ്വന്തം ആവശ്യപ്രകാരമാണ് ബസിൽ നിന്ന് ഇറങ്ങി മാറിയതെന്നും അദ്ദേഹം വ്യക്തമാക്കി. യാത്രയിലുണ്ടായിരുന്ന കുട്ടികൾ വിവരമറിയിച്ചതിനെ തുടർന്ന് ഉണ്ടായ സംഭവ വികാസങ്ങൾ വലിയ രീതിയിൽ മദ്യപാന വിവാദമാക്കി ചിത്രീകരിക്കുകയായിരുന്നു. താൻ കാരണമായി വിനോദയാത്ര മുടങ്ങരുത് എന്ന കരുതലിലാണ് മറ്റൊരു ബസിലേക്ക് മാറിയതെന്നും, തനിക്കെതിരെയുള്ള വിമർശനങ്ങൾ സ്വാഗതം ചെയ്യുമ്പോഴും വരുംകാലങ്ങളിൽ തുടർ വിദ്യാഭ്യാസം നേടേണ്ട വിദ്യാർത്ഥികളെ ഇതിലേക്ക് വലിച്ചിഴച്ച് സോഷ്യൽ മീഡിയയിലൂടെ അശ്ലീല കമന്റുകളിട്ട് വ്യക്തിഹത്യ ചെയ്യരുതെന്നും അദ്ദേഹം അഭ്യർത്ഥിച്ചു. കുട്ടികൾക്ക് തെറ്റ് പറ്റിയിട്ടുണ്ടെങ്കിൽ അത് തിരുത്തി മുന്നോട്ട് കൊണ്ടുപോകേണ്ട ഉത്തരവാദിത്തം മുതിർന്നവർക്കുണ്ടെന്നും അതിനാൽ വിദ്യാർത്ഥികളെ ഈ വിവാദങ്ങളിൽ നിന്ന് മാറ്റി നിർത്തണമെന്നും പിടിഎ പ്രസിഡന്റ് കൂട്ടിച്ചേർത്തു.