മുംബൈ: പ്രമുഖ ഹിന്ദി ടെലിവിഷൻ താരം അനുജ് ഠാക്കൂർ (33) അന്തരിച്ചു. ഒക്ടോബർ 27-ന് ഉറക്കത്തിനിടെയുണ്ടായ അപസ്മാരത്തെത്തുടർന്നായിരുന്നു അന്ത്യം. സുഹൃത്തും സഹപ്രവർത്തകനുമായ രൂപേഷ് സോനാർ ആണ് ഒക്ടോബർ 30-ന് ഇൻസ്റ്റഗ്രാമിലൂടെ മരണവിവരം സ്ഥിരീകരിച്ചത്.

 

ധൂം മച്ചാവോ ധൂം, ബീന്ദ് ബനൂംഗാ ഘോഡി ചഢൂംഗാ, മഹിസാഗർ തുടങ്ങിയ പ്രശസ്തമായ പരമ്പരകളിലൂടെ ശ്രദ്ധേയനായ നടനാണ് അനുജ്. അനുജിന്റെ കുടുംബവുമായി സംസാരിച്ച ശേഷമാണ് ഉറക്കത്തിനിടെയുണ്ടായ അപസ്മാരമാണ് മരണകാരണമെന്ന് വ്യക്തമായതെന്ന് രൂപേഷ് അറിയിച്ചു.

 

അനുജിന്റെ വിയോഗവാർത്ത ഞെട്ടലോടെയാണ് കേട്ടതെന്ന് രൂപേഷ് സോനാർ ‘ടൈംസ് ഓഫ് ഇന്ത്യ’യോട് പറഞ്ഞു. സംഭവം നടക്കുന്നതിന് പത്ത് ദിവസം മുമ്പാണ് അനുജിനെ അവസാനമായി കണ്ടതെന്നും അദ്ദേഹം ഓർത്തെടുത്തു.

 

“അനുജ് ദിവസവും പുലർച്ചെ 4.30-ന് ഉണരുന്ന ശീലക്കാരനായിരുന്നു. വ്യായാമവും ജോഗിങ്ങുമൊക്കെ കൃത്യമായി പിന്തുടർന്നിരുന്ന ആളാണ്. എന്നാൽ അന്ന് പുലർച്ചെ 4.30-ന് അലാറം മുഴങ്ങിയിട്ടും അനുജ് എഴുന്നേറ്റില്ല. തുടർന്ന് മുറിയിലെത്തിയ അമ്മയാണ് മകനെ ചലനമറ്റ നിലയിൽ കണ്ടെത്തിയത്,” രൂപേഷ് പറഞ്ഞു.

 

കഴിഞ്ഞ 17 വർഷമായി അനുജുമായി അടുത്ത സൗഹൃദമുണ്ടായിരുന്നതായി രൂപേഷ് ഇൻസ്റ്റഗ്രാം കുറിപ്പിൽ വ്യക്തമാക്കി. 2008-ൽ സംപ്രേഷണം ചെയ്ത ‘ബന്ധൻ സാത്ത് ജൻമോൻകാ’ എന്ന പരമ്പര മുതലാണ് ഇരുവരും ഒരുമിച്ച് പ്രവർത്തിക്കാൻ തുടങ്ങിയത്. തുടർന്ന് ‘ബീന്ദ് ബനൂംഗാ ഘോഡി ചഢൂംഗാ’ ഉൾപ്പെടെയുള്ള നിരവധി പ്രൊജക്റ്റുകളിലും ഇവർ ഒന്നിച്ചു.

 

“നിങ്ങൾ ഇനി ഞങ്ങൾക്കൊപ്പമില്ലെന്ന് വിശ്വസിക്കാൻ കഴിയുന്നില്ല. എനിക്ക് സുഹൃത്ത് മാത്രമല്ല, അനുജനെപ്പോലെയായിരുന്നു. ഒരുമിച്ച് ചെയ്യാൻ നിരവധി പ്രൊജക്റ്റുകൾ ആസൂത്രണം ചെയ്തിരുന്നു. കരിയറിന്റെ തുടക്കത്തിൽ നിങ്ങൾ നടത്തിയ പോരാട്ടങ്ങൾ ഞാൻ നേരിട്ട് കണ്ടതാണ്. ജീവിതം പ്രവചനാതീതമാണ്. ഇത്രയും നേരത്തെ നിങ്ങൾ വിടപറഞ്ഞുവെന്നത് താങ്ങാനാകുന്നില്ല” രൂപേഷ് കുറിച്ചു.