രാജ്യത്തെ അതിസമ്പന്നരുടെ എണ്ണത്തിൽ അഞ്ച് വർഷത്തിനിടെ വൻ വർധന. 100 കോടി രൂപയിലധികം വരുമാനം രേഖപ്പെടുത്തുന്നവരുടെ എണ്ണം 300 ശതമാനത്തിലധികം കൂടിയതായി സർക്കാർ പുറത്തുവിട്ട കണക്കുകൾ വ്യക്തമാക്കുന്നു. 2021-22 അസസ്‌മെന്റ് വർഷത്തിൽ 142 പേരായിരുന്നു 100 കോടിക്ക് മുകളിൽ വരുമാനമുണ്ടായിരുന്നവർ. 2025-26 ആയപ്പോഴേക്കും 576 പേരായി. അതേസമയം, ഇവരുടെ മൊത്തം ആസ്തി സംബന്ധിച്ച കണക്കുകളൊന്നും സർക്കാരിന്റെ പക്കലില്ല.

 

ധനകാര്യ സഹമന്ത്രി പങ്കജ് ചൗധരി പാർലമെന്റിൽ നൽകിയ മറുപടി പ്രകാരമുള്ള കണക്കുകൾ:

അഞ്ച് വർഷത്തിനിടെ അതിസമ്പന്നരുടെ എണ്ണത്തിൽ 300 ശതമാനത്തിലധികം വർധനവുണ്ടായി.

2023-24 കാലയളവിൽ നേരിയ കുറവുണ്ടായെങ്കിലും തൊട്ടടുത്ത വർഷങ്ങളിൽ എണ്ണം കുത്തനെ ഉയർന്നു.

നിലവിൽ 570-ലധികം ഇന്ത്യക്കാർ പ്രതിവർഷം 100 കോടി രൂപയ്ക്ക് മുകളിൽ വരുമാനം നേടുന്നുണ്ട്.

രാജ്യത്തെ സാമ്പത്തിക അസമത്വം വർധിക്കുന്നത് സംബന്ധിച്ച ആശങ്കകൾക്കിടയിൽ ഉപഭോഗ അസമത്വം കുറയുകയാണെന്ന് വിവിധ സർവേകൾ ചൂണ്ടിക്കാണിച്ച് സർക്കാർ ഉദാഹരിക്കുന്നു. ഹൗസ്ഹോൾഡ് കൺസംപ്ഷൻ എക്‌സ്‌പെൻഡിച്ചർ സർവേ (HCES) 2023-24:

 

ഗ്രാമീണ മേഖല: 0.266-ൽ നിന്ന് 0.237 ആയി കുറഞ്ഞു.

നഗര മേഖല: 0.314-ൽ നിന്ന് 0.284 ആയി കുറഞ്ഞു. ഇത് ഗ്രാമങ്ങളിലും നഗരങ്ങളിലും ഉപഭോഗത്തിലുള്ള വ്യത്യാസം കുറയുന്നതിനെ കാണിക്കുന്നു.

ദാരിദ്ര്യനിർമാർജനം

 

നീതി ആയോഗിന്റെ കണക്കനുസരിച്ച്, 2013-14 നും 2022-23 നും ഇടയിൽ ഏകദേശം 24.82 കോടി ആളുകൾ ദാരിദ്ര്യത്തിൽ നിന്ന് മുക്തരായി.

 

തൊഴിലില്ലായ്മ നിരക്ക്

 

തൊഴിലില്ലായ്മ നിരക്കിൽ കുറവുണ്ടായതായും ധനമന്ത്രാലയം.

 

2022-ൽ: 3.6%

2025-ൽ: 3.1%

രാജ്യത്തെ അതിസമ്പന്നരുടെ എണ്ണത്തിൽ കാര്യമായ വർധനവുണ്ടായതായി ആദായനികുതി കണക്കുകൾ വ്യക്തമാക്കുന്നുണ്ടെങ്കിലും സമ്പത്തിന്റെ കേന്ദ്രീകരണം സംബന്ധിച്ച പൂർണരൂപം ഇനിയും വ്യക്തമല്ല. ഔദ്യോഗികമായ ആസ്തി വിവരങ്ങളുടെ അഭാവം ഇതിനൊരു തടസ്സമാണ്. എന്നിരുന്നാലും, വിവിധ ക്ഷേമപദ്ധതികളിലൂടെയും നികുതി സംവിധാനങ്ങളിലൂടെയും സാമ്പത്തിക അസമത്വം കുറയ്ക്കാൻ കഴിഞ്ഞെന്നാണ് സർക്കാരിന്റെ നിലപാട്.