spotnewswebsite@gmail.com
ദുബൈ: ഓണ്ലൈന് തട്ടിപ്പുകള് തടയുന്നതിന്റെ ഭാഗമായി മൂന്ന് മാസത്തിനിടെ 103 വ്യാജ സോഷ്യല് മീഡിയ അക്കൗണ്ടുകള് പൂട്ടിച്ച് ദുബൈ പൊലീസ്. ഏപ്രില് മുതല് ജൂണ് വരെയുള്ള കാലയളവിലാണ് ഇത്രയും അക്കൗണ്ടുകള്ക്കെതിരെ നടപടിയെടുത്തത്. ക്രിമിനല് അഫയേഴ്സ് ഡെപ്യൂട്ടി കമാന്ഡര്-ഇന്-ചീഫ് മേജര് ജനറല് ഹരേബ് അല് ഷംസിയുടെ അധ്യക്ഷതയില് നടന്ന ജനറല് ഡിപ്പാര്ട്ട്മെന്റ് ഓഫ് ക്രിമിനല് ഇന്വെസ്റ്റിഗേഷന്റെ അവലോകന യോഗത്തിലാണ് ഈ കണക്കുകള് പുറത്തുവിട്ടത്.
ഓണ്ലൈന് തട്ടിപ്പുകളെ ചെറുക്കുന്നതിനും സൈബര് തട്ടിപ്പുകളില് നിന്ന് ജനങ്ങളെ രക്ഷിക്കുന്നതിന്റെ ഭാഗമായാണ് നീക്കം. വഞ്ചനയും സൈബര് കുറ്റകൃത്യങ്ങളും ഉയര്ന്നുവരുന്ന സാഹചര്യത്തില് നിയമ നിര്വ്വഹണ ഏജന്സികള്, പൊതു സ്ഥാപനങ്ങള്, സമൂഹത്തിലെ അംഗങ്ങള് എന്നിവ തമ്മില് അടുത്ത സഹകരണം ആവശ്യമാണെന്ന് അല് ഷംസി പറഞ്ഞു.
തട്ടിപ്പുകളില് ജനങ്ങള് ജാഗ്രത പാലിക്കണം. വിശ്വസനീയമല്ലാത്ത വ്യക്തികളുമായോ സമൂഹ മാധ്യമ അക്കൗണ്ടുകളുമായോ വ്യക്തിഗത വിവരങ്ങളോ ബാങ്കിങ് വിവരങ്ങളോ പങ്കിടരുത്. സംശയാസ്പദമായ പ്രവര്ത്തനങ്ങളോ തട്ടിപ്പ് ശ്രമങ്ങളോ ഉടന് റിപ്പോര്ട്ട് ചെയ്യണമെന്നാണ് നിര്ദേശം.
