നെടുമ്പാശേരി ∙ ഉറപ്പായ ടിക്കറ്റുകളുമായി എത്തിയ യാത്രക്കാർക്ക് സാങ്കേതിക പിഴവിനെ തുടർന്ന് എയർ ഇന്ത്യ എക്സ്പ്രസ് വിമാനത്തിൽ പോകാനായില്ല. തിങ്കളാഴ്ച രാത്രി 9.30ന് കൊച്ചിയിൽ നിന്ന് പുറപ്പെട്ട അബുദാബി വിമാനത്തിലാണ് സംഭവം.

 

കോഡ് ഷെയർ പ്രകാരം എയർ ഇന്ത്യയുടെ വെബ് സൈറ്റിൽ ടിക്കറ്റ് ബുക്കു ചെയ്യുന്നവർക്കും എയർഇന്ത്യ എക്സ്പ്രസ് വിമാനത്തിൽ യാത്ര ചെയ്യാൻ സൗകര്യമുണ്ട്. ഈ സൗകര്യം ഉപയോഗപ്പെടുത്തിയാണ് 48 യാത്രക്കാർ കൊച്ചിയിൽ നിന്ന് അബുദാബിയിലേക്ക് ടിക്കറ്റ് ബുക്കു ചെയ്തത്.

 

എന്നാൽ ഈ യാത്രക്കാരുടെ പേരുകൾ എയർ ഇന്ത്യ എക്സ്പ്രസ് ബുക്കിങ് ലിസ്റ്റിൽ വന്നില്ല. ഇവർ വിമാനത്താവളത്തിൽ എത്തിയപ്പോഴാണ് ലിസ്റ്റിൽ പേരില്ലെന്ന് എയർ ഇന്ത്യ എക്സ്പ്രസ് അധികൃതർ പറയുന്നത്. യാത്രക്കാർ വിമാനത്താവളത്തിൽ പ്രതിഷേധിച്ചു. തുടർന്ന് ഏതാനും യാത്രക്കാരെ എയർഇന്ത്യ എക്സ്പ്രസ് വിമാനത്തിൽ തന്നെ കൊണ്ടുപോയി. ബാക്കി യാത്രക്കാരെ മറ്റു കമ്പനികളുടെ സർവീസുകളിലും അയച്ചു.