ദിസ്പുർ ∙ ജിമ്മിലെ വ്യായാമത്തിനിടെ ഡോക്ടർ കുഴഞ്ഞുവീണ് മരിച്ചു. അസം മെഡിക്കല്‍ കോളജിലെ പ്രൊഫസറായ ഡോ. സഹിന്‍ റഹ്മാൻ (47) ആണ് മരിച്ചത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്.

 

യാതൊരു അസ്വസ്ഥതയും പ്രകടിപ്പിക്കാതെയാണ് സഹിൻ വ്യായാമം ചെയ്തിരുന്നതെന്ന് ദൃശ്യങ്ങളിൽ വ്യക്തമാണ്. വർക്ക് ഔട്ട് ചെയ്യുന്നതിന്റെ വേഗത കുറയുന്നതും പിന്നീട് കുഴഞ്ഞുവീഴുന്നതും ദൃശ്യങ്ങളിലുണ്ട്. ഒപ്പമുണ്ടായിരുന്നവര്‍ ഓടിക്കൂടി അദ്ദേഹത്തെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അദ്ദേഹത്തിന്റെ മരണകാരണം ഇതുവരെ സ്ഥിരീകരിച്ചിട്ടില്ല.

 

ജിമ്മിലെ വ്യായാമത്തിനിടെ കുഴഞ്ഞുവീണ് മരിക്കുന്ന സംഭവങ്ങൾ സമീപകാലത്തേറി വരികയാണ്. ഇക്കഴിഞ്ഞ ജൂണിൽ ഉത്തരാഖണ്ഡിൽ 38കാരൻ ജിമ്മിൽ കുഴഞ്ഞുവീണ് മരിച്ചിരുന്നു. ഓഗസ്റ്റിൽ പുനെയിലും സമാന സംഭവം റിപ്പോർട്ട് ചെയ്തു. ബിസിനസുകാരനായ മിലന്ദ് കുൽകർണിയാണ് അന്ന് മരണത്തിന് കീഴടങ്ങിയത്.