spotnewswebsite@gmail.com
ബെലഗാവി: കര്ണാടകയിലെ ബെലഗാവിയില് ചിക്കന് കഷ്ണങ്ങള് കൂടുതല് കഴിച്ചതിനെച്ചൊല്ലിയുള്ള തര്ക്കത്തിനൊടുവില് യുവാവ് സുഹൃത്തിനെ കുത്തിക്കൊലപ്പെടുത്തി. ഉത്തര്പ്രദേശ് പിലിഭിത് സ്വദേശിയായ സീതാറാം ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഇയാളുടെ സുഹൃത്തും പിലിഭിത് സ്വദേശിയുമായ അരുണിനെ പൊലീസ് അറസ്റ്റ് ചെയ്തു.
ബെലഗാവിയിലെ സ്റ്റീല് കമ്പനിയില് ജോലി ചെയ്തുവരികയായിരുന്ന ഇരുവരും മറ്റ് തൊഴിലാളികള്ക്കൊപ്പം ഒരേ ഷെഡിലാണ് താമസിച്ചിരുന്നത്. ഞായറാഴ്ച അവധിയായതിനാല് എല്ലാവരും ചേര്ന്ന് മദ്യപിക്കുകയും ചിക്കന് പാകം ചെയ്ത് കഴിക്കുകയുമായിരുന്നു. ഭക്ഷണം കഴിക്കുന്നതിനിടെ അരുണ് കൂടുതല് ചിക്കന് കഷ്ണങ്ങള് കഴിക്കുന്നുവെന്ന് ആരോപിച്ച് സീതാറാം വഴക്കിട്ടു.
മദ്യലഹരിയിലായിരുന്ന ഇരുവരും തമ്മിലുള്ള വാക്കുതര്ക്കം പെട്ടെന്ന് അക്രമത്തില് കലാശിക്കുകയും അരുണ് കത്തിയെടുത്ത് സീതാറാമിന്റെ നെഞ്ചില് കുത്തുകയുമായിരുന്നു.
ഗുരുതരമായി പരിക്കേറ്റ സീതാറാമിനെ അരുണ് തന്നെയാണ് ആശുപത്രിയിലെത്തിച്ചത്. കെട്ടിടത്തില് നിന്ന് വീണ് പരിക്കേറ്റതാണെന്നാണ് ഇയാള് ആശുപത്രി അധികൃതരോടും പൊലീസിനോടും പറഞ്ഞത്. എന്നാല് സംശയം തോന്നിയ പൊലീസ് അരുണിനെ വിശദമായി ചോദ്യം ചെയ്തതോടെ കൊലപാതകം ഇയാള് സമ്മതിക്കുകയായിരുന്നു. ആശുപത്രിയില്വെച്ചാണ് സീതാറാം മരിച്ചത്.
