കണ്ണൂര്‍:: ഇരിട്ടി തില്ലങ്കേരിയില്‍ അര്‍ധരാത്രി അടുക്കളയില്‍ ജനല്‍ വഴി കയറി കഞ്ഞിക്കലത്തിനകത്ത് പതിയിരുന്ന മൂര്‍ഖന്‍ പാമ്പിനെ പിടികൂടി. വളര്‍ത്തുപൂച്ചയുടെ കരച്ചിലാണ് വീട്ടുകാരെ അപകടത്തില്‍ നിന്ന് രക്ഷിച്ചത്. തില്ലങ്കേരിയിലെ മുനീറിന്റെ വീട്ടിലാണ് സംഭവം.

 

സംഭവസമയം വീട്ടുകാരെല്ലാം നല്ല ഉറക്കത്തിലായിരുന്നു. അടുക്കളയില്‍ നിന്ന് പൂച്ചയുടെ കരച്ചിലും ബഹളവും കേള്‍ക്കുന്നത്. സാധാരണ പോലെ എന്തെങ്കിലും ഇരപിടിക്കുന്നതാകുമെന്നാണ് ആദ്യം കരുതിയതെങ്കിലും, പൂച്ചയുടെ നിര്‍ത്താതെയുള്ള കരച്ചില്‍ കേട്ട് വന്ന് നോക്കിയപ്പോഴാണ് അടുക്കളയിലെ കഞ്ഞിക്കലത്തില്‍ നിന്നും മൂര്‍ഖന്‍ പാമ്പിനെ കണ്ടെത്തിയത്.

 

തുടര്‍ന്ന് മുനീര്‍ ഉടന്‍ തന്നെ മാര്‍ക്ക് പ്രവര്‍ത്തകരെ രക്ഷാപ്രവര്‍ത്തകരെ ഫോണില്‍ ബന്ധപ്പെടുകയായിരുന്നു. വിവരം അറിഞ്ഞയുടന്‍ മാര്‍ക്ക് പ്രവര്‍ത്തകന്‍ ഫൈസല്‍ വിളക്കോട് വീട്ടിലെത്തുകയും മൂര്‍ഖന്‍ പാമ്പിനെ പിടികൂടുകയും കാട്ടിലേക്ക് വിടുകയും ചെയ്തു. വളര്‍ത്തു പുച്ചയുടെ ഇടപെടലാണ് വീട്ടുകാരെ രക്ഷപെടുത്തിയത്.