ജയ്പുർ ∙ നൂഡിൽസ് കഴിച്ചതിനു പിന്നാലെ ഏഴുവയസ്സുകാരി മരിച്ചു. ജയ്പുർ സ്വദേശി പിഹു കുമാവത്താണ് മരിച്ചത്. കുട്ടിയുടെ മൂത്ത സഹോദരി ദിവ്യാംശി ആശുപത്രിയിൽ ചികിത്സയിലാണ്. ഭക്ഷ്യവിഷബാധയേറ്റതാണെന്നാണ് സംശയം.
വ്യാഴാഴ്ച ഉച്ചയ്ക്ക് ദിവ്യാംശിയും പിഹുവും നൂഡിൽസുണ്ടാക്കി. അമ്മ ജോലി കഴിഞ്ഞ് വീട്ടിലെത്തിയപ്പോൾ കുട്ടികൾ ക്ഷീണിതരായിരുന്നു. ഉടൻ തന്നെ ഇരുവരെയും ആശുപത്രിയിൽ എത്തിച്ചെങ്കിലും പിഹു മരിച്ചു. കുടുംബം പൊലീസിൽ പരാതി നൽകി.
മരണകാരണം സ്ഥിരീകരിക്കാൻ പോസ്റ്റുമോർട്ടം റിപ്പോർട്ട് വരണമെന്നു പൊലീസ് പറഞ്ഞു. കുട്ടികൾ കഴിച്ച നൂഡിൽസിന്റെ സാംപിൾ പരിശോധനയ്ക്കായി ലാബിലേക്ക് അയച്ചു. ഇവരുടെ സഹോദരൻ ഗോവിന്ദ് അസുഖ ബാധിതനായി രണ്ടു മാസമായി ചികിത്സയിലാണ്.






