അടുത്തിടെയാണ് നടൻ അജിത് കുമാറിന്റെ അമ്മ മോഹിനി അന്തരിച്ചത്. വാര്‍ധക്യ സഹജമായ അസുഖങ്ങളെ തുടര്‍ന്ന് ചെന്നൈയിലെ സ്വകാര്യ ആശുപത്രിയില്‍ വച്ചായിരുന്നു അന്ത്യം. ഹൃദയം നുറുങ്ങുന്ന വേദനയ്ക്കിടയിലും ഇപ്പോൾ തന്റെ ജോലി തിരക്കുകളിലേക്ക് മടങ്ങിയെത്തിയിരിക്കുകയാണ് താരം.

 

അജിത്തിനെ പിന്തുണച്ചും ആശ്വാസവാക്കുകൾ പറഞ്ഞും നിരവധി പേരാണ് രംഗത്തെത്തിയിരിക്കുന്നത്. റേസിങ് ട്രാക്കിലേക്ക് തിരികെയെത്തിയ അജിത് കുമാറിന്റെ ചിത്രങ്ങളാണിപ്പോൾ ആരാധകർക്കിടയിൽ വൈറലാകുന്നത്. അജിത് കുമാർ റേസിങ് ടീമിന്റെ ഔദ്യോഗിക അക്കൗണ്ടിലൂടെയാണ് നടന്റെ ഏറ്റവും പുതിയ ചിത്രങ്ങൾ പുറത്തുവന്നിരിക്കുന്നത്.

‘ഹൃദയ വേദനയോടെ ജോലിയിലേക്ക് തിരികെ എത്തി, പക്ഷേ ജീവിതം മുന്നോട്ട് പോകണം!’- എന്നാണ് അജിത്തിന്റെ ചിത്രങ്ങൾക്ക് ക്യാപ്ഷനായി കുറിച്ചിരിക്കുന്നത്. ‘അമ്മ എപ്പോഴും നിങ്ങളുടെ കൂടെ തന്നെയുണ്ടാകും’, ‘അമ്മയുടെ അനുഗ്രഹം എപ്പോഴും നിങ്ങൾക്കൊപ്പമുണ്ടാകും’, ‘അമ്മ നിങ്ങളെ കാണുന്നുണ്ട്…നിങ്ങൾ ജയിക്കണമെന്ന് ആഗ്രഹിക്കുന്നുണ്ട്…കടന്നു വരൂ’- എന്നൊക്കെയാണ് സോഷ്യൽ മീഡിയയിൽ നിറയുന്ന കമന്റുകൾ.

 

അജിത്തിന്റെ വീട്ടിൽ അനുശോചനമറിയിച്ച് തമിഴ്നാട് മുഖ്യമന്ത്രിയും നടനുമായ വിജയ് എത്തിയത് വാർത്തയായി മാറിയിരുന്നു. നടി തൃഷയ്ക്കൊപ്പമായിരുന്നു അജിത് എത്തിയത്. അഭിനയത്തിൽ നിന്ന് ഇടവേളയെടുത്ത അജിത് ഇപ്പോൾ റേസിങ് രംഗത്ത് സജീവമാണ്. ഗുഡ് ബാഡ് അഗ്ലിയാണ് അജിത്തിന്റേതായി ഒടുവിൽ തിയറ്ററുകളിലെത്തിയ ചിത്രം.